Smyrjið bagettusneiðar með örlítilli olíu og grillið í ofni á báðum hliðum í nokkrar mínútur eða þar til þær fá á sig gullna skorpu.

Hellið ólífuolíu á pönnu og mýkið graskersteninga þar til mjúkir undir tönn og þeir hafa fengið á sig smá lit af elduninni. Setjið trönuber saman við graskerið og hrærið. Saltið og piprið og stráið smá timjan yfir. Látið malla saman í 5 mínútur.

Takið brauðsneið, leggið Kastalasneið ofan á hana, þá graskers- og trönuberjablöndu og skreytið með timjan. Berið fram.

Hitið ofn í 220 gráður. Leggið perusneiðar á pappírsklædda ofnplötu. Stráið púðursykri yfir sneiðarnar og stingið í ofn þar til sykurinn hefur bráðnað. Takið úr ofninum og kælið.

Leggið sneið af osti á hverja perusneið. Vefjið hráskinku upp og leggið á ostinn. Dreypið sultudropa í miðju hráskinkunnar og stráið örlitlu af muldum gráðaosti eða Ljóti yfir snittuna. Berið fram sem forrétt eða smárétt.

Hitið ofn í 180 gráður. Skerið toppinn af ostinum í burtu, þunnt lag. Stingið lítil göt ofan í ostinn. Athugið að þið getið notað pappírinn sem er utan um ostinn, notað smjörpappír eða sleppt því alveg. Setjið ostinn á disk eða fat sem má fara í ofn.

Hrærið saman hunang, balsamedik og vín. Dreypið vökvanum yfir ostinn. Stráið piparblöndunni yfir og leggið ferskar kryddjurtir yfir að lokum.

Setjið í heitan ofn. Bakið í 10-15 mínútur eða þar til osturinn er orðinn vel mjúkur og heitur. Athugið að það er erfitt að færa hann til þegar hann er mjög mjúkur og nýkominn úr ofninum.

Berið fram með góðu brauði, grilluðum bagettusneiðum, eplasneiðum, berjum og hnetum og búið til gómsætan munnbita.

Hitið ofn í 200 gráður. Setjið vín, vatn, smjör og salt saman í pott og komið upp suðu við vægan hita. Þegar það gerist setjið þið hveiti út í vökvann og hrærið mjög vel þar til úr verður gott og gljáandi deig sem er laust frá hliðum pottsins. Slökkvið undir hellunni.

Setjið deigið í skál, hrærið saman við það eitt egg í einu með trésleif og úr skal verða mjúkt og áferðarfallegt deig. Blandið mulda gráðaostinum saman við og hrærið hann vel út í deigið ásamt svörtum pipar.

Búið til litlar bollur sem þið setjið á pappírsklædda bökunarplötu.

Bakið í 20 mínútur eða þar til bollurnar eru fallega gullnar. Berið fram einar og sér eða sem rétt á smáréttaborð.

Hitið ofn í 180 gráður. Fletjið út smjördeig og leggið ostinn á mitt deigið. Hér má hugmyndaflugið sem og listrænir hæfileikar njóta sín til að klæða ostinn vandlega inn í deigið en gætið að því að skilja toppinn eftir opinn. Þið myndið n.k. skál utan um ostinn. Stingið nokkur göt í toppinn á ostinum.

Hrærið ber, sætu, edik, vatn, stjörnuanís og rósmaríngrein saman í potti á vægum hita þar til berin eru þýð og blandan tekur að þykkna, tekur um 10 mínútur.

Fjarlægið stjörnuanísinn og rómaríngreinina úr blöndunni. Hellið berjablöndunni yfir toppinn á ostinum.

Bakið ostinn í 15-20 mínútur eða þar til smjördeigið er fallega gullið og örlítið stökkt og osturinn mjúkur.

Hitið olíu á pönnu og mýkið rauðlauk á lágum hita þar til hann er glær og lungamjúkur. Til að hann nái fullkominni áferð er gott að láta hann malla í 20 mínútur, strá þá sykri yfir hann, hræra vel og láta hann malla áfram í aðrar 20 mínútur. Sé sá tími ekki til staðar má fara styttri leið og helminga tímann með því að mýkja laukinn á hærri hita. Við það þarf einungis að gæta að laukurinn brenni ekki.

Bræðið saman í potti rjómaost, Ísbúa eða Cheddar, Höfðingja og sýrðan rjóma á lágum hita. Ef blandan er voða þykk er um að gera að bæta í hana sýrðum rjóma eða rjóma. Smakkið til með salti og pipar.

Ofninn hitaður á 180°C

Brie osturinn er lagður á deigið, 2 msk sýróp og pekanhnetukurl að vild sett á ostinn og honum síðan pakkað inn.

Deigið er penslað með eggi og bakað í ofni í 10-15 mínútur eða þar til smjördeigið hefur tekið lit.

Toppað með meira sýrópi og pekanhnetum.

Ofninn hitaður í 200°C.
Smjördeigið er skorið í ferninga og flett örlítið upp á hliðunum.
Laukurinn er settur á pönnu með smjörinu, olíunni, salti og pipar og steikt í 5-10 mínútur á miðlungshita. Þá er sykrinum bætt út í og hrært í 1-2 mínútur, passa að laukurinn brenni ekki við.
Beikonið er skorið í litla bita og steikt á pönnu.
Gráðosturinn er brytjaður smátt niður.
Lauknum, beikoninu og gráðostinum blandað saman og sett á snitturnar.
Inn í ofn í 15-20 mínútur eða þar til deigið er orðið örlítið brúnleitt.
Æðislegt að bera fram með bláberjasultu.

Ofninn hitaður í 180°C

Olían er sigtuð frá tómötunum og þeir saxaðir smátt

Pressuðum hvítlauksrifjum er næst blandað við

Sett á ostinn og inn í ofn í 15-20 mínútur

Best nýkomið út úr ofninum með kexi

Skorið er í döðlurnar, ef það er steinn er hann tekinn úr.

Gráðosturinn er brytjaður og settur inn í döðlurnar og hverri döðlu vafið inn í 1/3 af parmaskinkusneið ,fest með tannstöngli og sett í ofn í 10-15 mínútur.

1. Setjið smjördeigið á ofnplötu klædda bökunarpappír og brjótið aðeins upp á kantana á deiginu. Pikkið botninn með gaffli. Forbakið í 10 mínútur við 220°.
2. Dreypið sítrónusafa yfir perurnar og leggið þær síðan ofan á smjördeigsbotninn. Sáldrið ostinum yfir. Loks ólífuolíu, hunangi og salti. Bakið áfram í u.þ.b. 10 mínútur. Dreifið furuhnetum yfir.

Meðlæti:
niðurskorið súrdeigsbrauð

1. Blandið hveiti saman við ostana.
2. Setjið hvítvín og hvítlauk saman í pott og hitið. Setjið ostablönduna út í, smátt og smátt. Hafið á mjög lágum hita og hrærið stöðugt í.
3. Þegar osturinn er bráðinn takið þá af hitanum og smakkið til með múskati, pipar og hunangi ef vill. Berið strax fram með niðurskornu súrdeigsbrauði.

1. Setjið vatn, sykur, apríkósur og stjörnuanís í pott og látið malla þar til mest allt vatnið er gufað upp og vökvinn er orðinn sírópskenndur.
2. Látið helminginn af apríkósunum á annan ostahelminginn ásamt helmingnum af beikoninu. Setjið hinn helminginn af ostinum ofan á og toppið með restinni af apríkósunum og beikoni.
3. Látið í eldfast form eða á ofnplötu klædda bökunarpappír. Bakið í u.þ.b. 15 mínútur við 180°. Sáldrið loks furuhnetunum yfir. Berið fram með brauði eða kexi.

Hitið ofn í 180 gráður. Takið ostinn úr umbúðunum og setjið í eldfast mót. Skerið gráfíkjurnar í þunnar sneiðar og setjið í lítinn pott. Hellið vatninu yfir þær, stráið sykrinum yfir blönduna og látið suðuna koma upp. Sjóðið við vægan hita þar til gráfíkjurnar eru orðnar mjúkar og sætar og úr verður hálfgerð sulta.
Athugið að hér má stytta sér leið og kaupa fíkjusultu en gott er að setja nokkrar sneiddar gráfíkjur saman við hana. Setjið 1 dl af sultunni í pott og hitið við vægan hita. Setjið gráfíkjurnar saman við og látið þær mýkjast aðeins upp.
Grófsaxið pistasíurnar og valhneturnar. Hrærið þær saman við fíkjusultuna í pottinum. Hellið blöndunni yfir ostinn og dreypið sírópinu yfir allt saman að lokum. Saltið aðeins og piprið.
Stingið í heitan ofninn í um tíu mínútur eða þar til osturinn er alveg mjúkur og nánast fljótandi að innan.
Berið fram með góðu brauði eða kexi. Einnig má þræða brauðbita upp á grillpinna, dreypa yfir þá ólífuolíu og grilla, stinga í ofn eða hita á pönnu.

Setjið Camembert, rjómaost, reyktan silung eða lax, ferskt dill og sítrónusafa í matvinnsluvél. Maukið þar til úr verður jöfn blanda, ákveðið grófleika blöndunnar sjálf, slíkt er smekksatriði.
Skerið kúrbítinn í þunnar sneiðar, langsöm. Gott er að gera slíkt í mandólíni eða með kartöfluskrælara. Grillið sneiðarnar örlítið, setjið á disk og dreypið smá ólífuolíu yfir.
Smyrjið bagettusneiðarnar með góðu majónesi. Setjið ostablönduna með teskeið á hverja sneið. Rúllið kúrbítssneið upp og stingið í ostablönduna. Raðið á bakka eða disk. Saltið og piprið og dreypið ólífuolíu yfir. Skreytið með fersku dilli.
Einnig er gott að setja eina teskeið af ostamauki á kúrbítssneið og rúlla upp ef vilji er til að sleppa brauðinu.

Hitið ofn í 180 gráður. Setjið berin í pott, vatnið yfir sem og sykurinn og sírópið. Athugið að berin geta verið að eigin vali, blönduð eða ein tegund. Látið suðuna koma upp á berjablöndunni og látið hana malla á vægum hita þar til berin mýkjast upp. Það má sleppa því að nota kartöflumjölið ef blandað þykknar og lítur vel út en ef hún er mjög vökvakennd er gott að strá örlitlu kartöflumjöli yfir hana og hræra vel. Látið blönduna sjóða aðeins og þykkna þannig.
Stingið ostinum í ofninn í umbúðunum og hitið í um tíu mínútur eða þar til osturinn er heitur í gegn og lungamjúkur.
Skerið brauðið í sneiðar og síðan í hálfar sneiðar. Smyrjið með smjöri og stingið í örlitla stund í heitan ofninn.
Smyrjið heitum og mjúkum ostinum á heitar brauðsneiðarnar, ekki spara hann, og setjið berjablöndu yfir. Skreytið með ferskri myntu og stráið flórsykri yfir til skrauts.
Magnið af þessari berjablöndu hentar eins og með einum osti. Ekki er hægt að setja inn fjölda brauðsneiða, því stærð þeirra ræður mestu um á hversu margar brauðsneiðar osturinn og berin passa.

Hitið pönnu og steikið nautakjötið í ólífuolíu, saltið og piprið. Gætið að því að steikja það ekki of mikið. Takið af pönnunni og látið kjötið standa þar til það kólnar, skerið það þá í þunnar sneiðar.
Setjið balsam-edikið í pott, látið suðuna koma upp og sjóðið það örlítið niður þar til það þykknar. Tekur nokkrar mínútur. Betra að hafa það þykkara þegar því er dreypt yfir snitturnar. Athugið að það heldur áfram að þykkna þegar það kólnar.
Smyrjið bagettusneiðarnar með smjöri, einnig er gott er nudda opnu hvítlauksrifi yfir þær, stingið aðeins í ofn þar til sneiðarnar fá á sig gullinn blæ.
Skerið ostinn í sneiðar, leggið ost á hverja snittu og þá kjötsneið. Dreypið edikinu yfir. Fallegt að fínsaxa smá salat og dreifa yfir, salta og pipra og dreypa örlítilli ólífuolíu yfir að lokum.

Ostar eru sniðugar tækisfærisgjafir og þá er gaman að pakka þeim inn á fallegan og smekklegan hátt. Hér eru nokkrar hugmyndir sem hægt er að styðjast við.

Þægilegt er að nýta þá hluti sem eru til heima eins og; gamlar tölur, prjónagarn, skrautdúka eða jafnvel stensla gjafapappír með kartöflustimpli. Þitt hugmyndaflug ræður ferðinni.

Skemmtileg viðbót á saumaklúbbskvöldinu eða í veisluna. Prentið út ostasmakkbakkann eftir fjölda gesta og klippið út. Við mælum með að líma blaðið á stífara undirlag svo hægt sé að halda á bakkanum. Skrifið lýsingar á bökunarpappír sem þið getið klippt eftir forminu hér.

Blandið saman matarsóda og kartöflumjöli í pott. Bætið við vatni og hitið við vægan hita. Hrærið í á meðan og blandan byrjar að þykkna. Þegar blandan fer að kekkjast (3–5 mín.) þá er deigið tilbúið.

Setjið deigið í skál og hyljið með rökum eldhúspappír. Leyfið að kólna í um 25 mín.  Fletjið deigið út og skerið í þau form sem þið viljið.

Leggið á bökunarpappír og látið þorna við stofuhita yfir nótt. Gætið þess að að snúa þarf skrautinu til að það þorni jafnt. Ef þið eruð óþolinmóð má baka skrautið í 60 mín.í 80°C heitum ofni til að flýta yfir. Gæta þess þá að snúa skrautinu eftir 30 mín.

Uppskrift og aðferð fengin á krom.is.

Málið eftir leiðbeiningum og látið þorna. Kalkmálningin sem við notuðum þurfti að baka í ofni en þannig málning hentar betur með matvælum. Þegar bakkinn er tilbúinn raðið þá ostum og meðlæti á og merkið. Gott er að nota krítartússpenna en þeir fást í öllum helstu föndurbúðum og jafnvel í mörgum litum. 

Það er gaman að bjóða upp á osta í veislum en oft vill það gerast að enginn veit hvaða ost verið er að borða. Með því að merkja þá getur fólk dásamað ostana með nafni.

Byrjið á að sækja miðana, prentið þá út og klippið svo til. Skrifið niður heiti ostanna og festið á t.d. tannstöngla.

Við höfum líka undirbúið merkta miða og merkta miða með lýsingu.